Slavo Svilanović: I mušljama pogoduje blaga jesen

 Slavo Svilanović: I mušljama pogoduje blaga jesen

Foto:portalnovi.me

More je ove jeseni toplo i tiho a to godi uzgoju mušlji. Slavo Svilanović ima svoju plantažu na granici Bijele i Kamenara. Zatekli smo ga kako radi, pomalo prodaje i hrani mačke koje ne biraju, kad nema ribe i mušlje su odlične.

Foto:portalnovi.me

-Nije bila neka sezona pa nam je ostalo i ovih velikih. Voda je još uvijek  topla,pa su mušlje  kvalitetne, ima puno mesa. S obzirom da je decembar mislio sam da će biti slabije, ali one su baš dobre. Pune su još uvijek“, priča za Portal Novi, Svilanović i kaže da je ljetos prodaja bila lošija i nemjerljiva sa ranijim sezonama, ali  da i zima ne obećava jer su restorani, uglavnom, zatvoreni zbog pandemije.

Foto:portalnovi.me

-Vrlo kratko je trajala sezona  i nešto se čupnulo.Ne valja se žaliti. Cijele godine ovdje na plantaži može da se radi, kada dozvoljava vrijeme. Upravo radim na rasadjivanju mladih da bi se moglo brati. Taj proces traje malte ne cijele godine. One dva put godisnje puštaju svoju mladj. A mi dok prodajemo uvijek ostavljamo one sitne koje možemo ponovo rasadit i vratiti  ih tamo da ponovo rastu. One se hrane planktonima, ali onda imaju tu neke druge stvari oko njih koje morate raditi u toku zimskih mjeseci kada nisu velike vrućine. Mreže koje stavljamo, povremeno moramo vaditi da ih malo osunčamo da ih ne bi napadali korali, kao i da bi bolje napredovale, da bi bilo više mesa na njima. Jer to sve što je pri njima, to su praktično paraziti i onda im ne daju da dovoljno napreduju pa poraste velika školjka a nema mesa“, objašnjava Slavo dok radi. Na plantaži nema gubljenja vremena svaki minut je ispunjen.

Foto: portalnovi.me

– Ove godine se pojavio malo veći mortalitet, još uvijek ne znamo je li to neki parazit ili je od velike toplote. More se svake godine zagrijava više. Institut  još nije  načisto što je uzrok tome, tako da to su neke stvari sa kojima se borimo. Ranije je bilo orada i one su nam pravile strašne probleme, sad toga nema“.

Foto:portalnovi.me

Ove godine bila je u planu preregistracija za uzgajivače mušlji i usklađivanje za domaćim i međunarodnim zakonodavstvom.Korona je taj posao odgodila za jul 2021. godine.

-Ministarstvo poljoprivrede je u ovoj godini pokazalo interesovanje za podršku vlasnicima plantaža. Ja nijesam stigao da se prijavim jer sam imao puno obaveza upravo oko papirologije.Imam samo još neke sitnice da završim.Od veterinarske inspekcije dobili smo uputstva za pravljenje purfikacionog centra gdje će jedan dio biti odvojen za pripremu, a drugi za prodaju . Mi još imamo tu sreću da nam je more čisto i nije se dogodilo da se neko otrovao“, kaže Svilanović objašnjavajući nam kako čuva stanište.

Foto:portalnovi.me

-Mi najčešće brojimo redove i nizove koje imamo ili bove koje drže. To je ustvari neki plivajući park, kako znaju da kažu, da bi to stajalo na površini. Jer najviše hrane za mušlju ima gore pri površini, tu je najviše planktona, i ona se hrani sa tim površinskim i tu negdje do 3, 4 metra površine, za razliku od kamenice(ostriga) koja hvata neki drugi plankton i ona sporije napreduje, njoj treba više vremena. Mušlji treba da naraste od male do konzumne veličine godina dana da bi se mogla prodati, a kamenici trebaju skoro dvije godine i ona je npr. specifična jer ne može da se premješta kao što može mušlja“.

Foto:portalnovi.me
Avatar

Portal Herceg Novi

Pročitajte još